Kieferorthopedie
D’Kieferorthopedie korrigéiert Feelstellunge vun de Kiferen (dento-fazial Orthopedie) an den Zänn (Orthodontie), fir d’Gläichgewiicht tëscht de Schankestrukturen an eng korrekt Zännokklusioun nees hierzestellen. Si fërdert eng gutt Entwécklung vun den Zännbéi aus funktionellen an ästheetesche Grënn.
Eng Feelstellung vun den Zännbéi kann Auswierkungen op d’Funktiounen vum Kauen, Schwätzen, Ootmen a Schlécken hunn. Gutt ausgeriicht Zänn loosse sech och méi einfach botzen, wat Karies an Zännfleeschproblemer entgéintwierkt.
Déi benotzten Apparater kënnen eraushuelbar (Placken oder Schinnen) oder fest (Brackets aus Metall oder Keramik) sinn. Si wierke kontinuéierlech mat doucen, ënnerschiddlech staarke Kräften iwwer eng méi oder manner laang Zäit:
- entweder op d’Schankestrukturen (Uewer- an Ënnerkifer) bei ganz jonke Kanner; dobäi handelt et sech ëm dento-fazial Orthopedie
- oder op d’Zänn; dobäi handelt et sech ëm Kieferorthopedie, déi an all Alter méiglech ass (Kanner, Jugendlecher, Erwuessener)
Um Enn vun der Behandlung ass eng Retentioun néideg, fir déi optimal Positioun vun den Zänn a Kiferen ze erhalen.
Bei Erwuessenen an och bei Jugendleche kënnen d’Zänn mat enger Serie vun Aligneren ausgeriicht ginn. Dat sinn transparent, ganz diskret a moossgemaachten eraushuelbar Schinnen (Invisalign).
Déi meescht Feelstellunge solle fréizäiteg behandelt ginn, och wann nach Mëllechzänn do sinn (interzeptiv Kieferorthopedie). Dofir ass eng kieferorthopedesch Ënnersichung bei jonke Kanner wichteg.